အမေစု မွေးနေ့မင်္ဂလာ အတွက် ဘလော့ခ်ဂါ ညီအကိုမောင်နှမ များမှမွေးနေ့ သဝဏ်လွှာ
လူထုလေးစားရသော ဒီမိုကရေစီ ခေါင်းဆောင် ဒေါ်အောင်ဆန်းစုကြည် အတွက် ဂုဏ်သိက္ခာကြီးသော ကမ္ဘာ့လွတ်ငြိမ်းချမ်းသာခွင့်အဖွ
“လူထုခေါင်းဆောင် ဒေါ်အောင်ဆန်းစုကြည်” ဆိုတဲ့ အမည်တစ်ခုဟာ ငြိမ်းချမ်းရေး၊ ဒီမိုကရေစီရေး နှင့် လူ့အခွင့်အရေးဆိုတဲ့ လူသားတိုင်း တန်ဖိုးထားသော အရေးသုံးပါးနဲ့အတူ မြန်မာပြည်သူတွေရဲ့ နှလုံးသားထဲမှာ လေးစားမြတ်နိုးစွာ ကိန်းဝပ်နေသည်မှာ ဆယ်စုနှစ် ၂ ခုကျော်ပြီ ဖြစ်သည်။သူမရဲ့ ရဲရင့်ခိုင်မာတဲ့ လုပ်ရပ်၊ မှန်ကန်ပြတ်သားတဲ့ စိတ်ဓါတ်တို့ကြောင့် ဒေါ်အောင်ဆန်းစုကြည်၏ ဂုဏ်သတင်း နှင့် မြန်မာ့ဒီမိုကရေစီ လှုပ်ရှားမှုကြီးသည်လည်း ကမ္ဘာကအလေးထား အားကျစရာ ဖြစ်လာခဲ့သည်။ ငြိမ်းချမ်းရေး နိုဗယ်ဆုရှင် တစ်ဦးဖြစ်သူ ဒေါ်အောင်ဆန်းစုကြည် သည် သူမ၏ မွေးနေ့မင်္ဂလာပွဲကို လွတ်လွတ်လပ်လပ် မကျင်းပနိုင်ခဲ့သည်မှာ နှစ်အတော်ကြာနေပြီ ဆိုတာကို တွေးမိဆင်ခြင်မိတိုင်း တုန်လှုပ်မိပါတယ်။ ငြိမ်းချမ်းရေးခေါင်းဆောင် တစ်ဦး ယခုလို မတရား ဖမ်းဆီးထောင်ကျခြင်းခံနေခြင်းဟာ အင်မတန် အကျည်းတန်သော အကြောင်းအရင်း တစ်ခု ဖြစ်ပါတယ်။ ငြိမ်းချမ်းသာယာပြီး ယဉ်ကျေးတဲ့ လူအဖွဲ့အစည်းကြီး ဖြစ်ပေါ်နိုင်ရန် ကမ္ဘာအနှံ့ ကြိုးစားတည်ဆောက်နေကြသလို၊ အာဏာပါဝါအတွက် ငြိမ်းချမ်းရေးကို ထိပါးနှောက်ယှက် နေသူများလည်းရှိနေသည်။ အာဏာရှင်စနစ် သည်ငြိမ်းချမ်းရေး၊ ဒီမိုကရေစီရေး နှင့် လူ့အခွင့်အရေး တို့၏ ဆန့်ကျင်ဘက်ဖြစ်ပြီး ဒီမိုကရေစီ ယဉ်ကျေးမှုကို အဆိုးဝါးဆုံး စိန်ခေါ်နေခြင်း လည်းဖြစ်သည်။ ငြိမ်းချမ်းရေး၊ ဒီမိုကရေစီရေး နှင့် လူ့အခွင့်အရေး အတွက် ပိုမို ကြိုးစား လုပ်ကိုင် ဆောင်ရွတ်သွား ရမည်ကိုလည်း သတိပေးနေသလို ဖြစ်ပါတယ်။
မြန်မာနိုင်ငံသည် ၁၉၆၂ ဗိုလ်ချုပ်နေဝင်း ၏စစ်အာဏာသိမ်းပြီး နောက်ပိုင်း ငြိမ်းချမ်းရေး၊ ဒီမိုကရေစီရေး နှင့် လူ့အခွင့်အရေး အားလုံးဆုံးရှုံး ပျောက်ကွယ်ခဲ့ရသည်။ ရဟန်းရှင်လူ၊ ကျောင်းသား၊ အလုပ်သမား၊ လယ်သမား အလွှာပေါင်းစုံ၊ လူတန်းစားပေါင်းစုံ တို့၏အသက်၊ အိုးအိမ် စည်းစိမ်တို့ ဆုံးရှုံးနစ်နာ နေခဲ့ရသည်မှာ ယနေ့ထက်တိုင်ပင်ဖြစ်သည်။ သွေးစွန်းတဲ့လက်တွေနဲ့ ယမ်းငွေ့ တထောင်းထောင်းထနေတဲ့ သေနတ်တွေ ကိုင်ထားတဲ့ စစ်အာဏာရှင်တွေကို ရဲရဲရင့်ရင့် တည်တည်ငြိမ်ငြိမ် လက်ညှိုးထိုးပြီး ပြည်သူ့ဘက်က ရပ်တည်ပေးတဲ့ အာဇာနည် သူရဲကောင်းတွေလည်း များစွာ ပေါ်ပေါက်ခဲ့ပါတယ်။ လူထုခေါင်းဆောင် ဒေါ်အောင်ဆန်းစုကြည် ဟာ အာဏာရှင်လက်အောက်ရောက် မြန်မာတမျိုးသားလုံးအတွက် ငြိမ်းချမ်းရေး၊ လူ့အခွင့်အရေး နှင့် ဒီမိုကရေစီရေး အတွက် မီးရှုးတန်ဆောင်တစ်ခုပင်ဖြစ်သည်။ နိုင်ငံသားတို့၏ လူ့ဂုဏ်သိက္ခာကို လေးစားတန်ဖိုး ထားကြရန် စစ်အာဏာရှင်တွေကို မကြောက်မရွံ့ တိုက်တွန်းစိန်ခေါ်ခဲ့သည်။
ဒေါ်အောင်ဆန်းစုကြည်၏ မွေးနေ့ဖြစ်တဲ့ ဇွန်လ ၁၉ ရက်နေ့ကို “မြန်မာနိုင်ငံ အမျိုးသမီးများနေ့“ (Women of Burma Day) အဖြစ် ၁၉၉၇ ခုနှစ်မှ စတင်၍ ပြည်တွင်းပြည်ပရှိ မြန်မာများမှ တညီတညွတ်တည်း သတ်မှတ် ဂုဏ်ပြုခဲ့ကြသည်။ သူမသည် လက်နက်အားကိုးဖြင့် မတရားဖိနှိပ်ချုပ်ချယ်နေသော စစ်အာဏာရှင်တွေကို မကြောက်တရား စိတ်ဓါတ်ဖြင့် အကြမ်းမဖက် ရင်ဆိုင်ခဲ့သည်။ သူမကိုယ်တိုင် ငြိမ်းချမ်းရေးတရားကို စွဲစွဲမြဲမြဲ လက်ခံကျင့်သုံးနေသလို တခြားလူတွေကိုလည်း ငြိမ်းချမ်းရေးတရား နှင့် ဒီမိုကရေစီ လမ်းစဉ်ကို လမ်းညွှန်ပြသနိုင်သူဖြစ်သည်။
“လူတို့အား အဂတိ လိုက်စားဖောက်ပြား စေသည်မှာ အာဏာမဟုတ်၊ စိုးရိမ်ကြောက်ရွံ့ခြင်းပင် ဖြစ်သည်။ အာဏာလက်လွှတ်ရမည်ကို ကြောက်ရွံ့ခြင်းသည် အာဏာကိုင်ထားသူတို့အား ဖောက်ပြန်စေသည်” ဟု ဒေါ်အောင်ဆန်းစုကြည် က “ကြောက်ရွံ့ခြင်း” နှင့် “အာဏာရှင်” တို့၏ သဘောလက္ခဏာ ကိုခွဲခြမ်းစိတ်ဖြာ ပြခဲ့သည်။ အခြေခံ လူ့အခွင့်အရေးများ မရှိဟု ငြင်းပယ်ထားသော စနစ်အောက်တွင် ကြောက်ရွံ့စိတ်သာ နေ့စဉ်နှင့်အမျှ လွှမ်းမိုးနေမည်။ မြန်မာနိုင်ငံတွင်း လူ့အခွင့်အရေး နှင့် ဒီမိုကရေစီရေး အတွက်လှုပ်ရှားများသည် လူ့သားဘဝ နှင့် လူ့ဂုဏ်သိက္ခာ အတွက် လှုပ်ရှားနေခြင်း တစ်ခုသာ ဖြစ်သည်ဟု ပြတ်ပြတ်သားသား ဖော်ထုတ်ပြသူဖြစ်သည်။
စစ်အာဏာရှင်များက ဒီမိုကရေစီခေါင်းဆောင် ဒေါ်အောင်ဆန်းစုကြည် အပါအဝင် ယုံကြည်ချက်ခိုင်မာသော ငြိမ်းချမ်းရေး နှင့်လူ့အခွင့်အရေး လှုပ်ရှားသူ ၂၄၀၀ ကျော်ကို မတရား ဖမ်းဆီးထောင်ချပြီး လူ့အခွင့်အရေး ကိုပြောင်ပြောင်တင်းတင်း ချိုးဖောက်ပြီး ကမ္ဘာ့လူ့အဖွဲ့အစည်း တစ်ခုလုံးကို စိန်ခေါ်နေပြီ ဖြစ်ကြောင်း သတိပေးအပ်ပါတယ်။ နောင်လာမည့် နှစ်အဆက်ဆက် ရတုအဆက်ဆက် တွေမှာ လေးစားချစ်ခင်ရသော ဒေါ်အောင်ဆန်းစုကြည် ကိုယ်တိုင် သူမ၏မွေးနေ့မင်္ဂလာပွဲကို ပြည်သူတို့နှင့်အတူ လွတ်လပ်ပျော်ရွှင်စွာ ဆင်နွှဲနိုင်ပါစေလို့ ငြိမ်းချမ်းရေး နှင့် ဒီမိုကရေစီကို မြတ်နိုးတန်ဖိုးထားသော ပြည်ထောင်စု မြန်မာနိုင်ငံသားအားလုံး ကဆုမွန်ကောင်းတောင်းလိုက်သည်။
ဒီမိုကရေစီရေး၊ လူ့အခွင့်အရေး နှင့် အမှန်တရား အတွက် အကြောက်တရားကင်းသောစိတ် ကိုတွန်းအားဖြစ်စေဖို့ အမေစု ဟာ ကမ္ဘာမြေကြီးရဲ့ နေရာအနှံ့အပြားရှိ ငြိမ်းချမ်းရေး မြတ်နိုးသူတို့၏ ရင်ထဲမှာ အစဉ်ထာဝရ ရှင်သန်နေမှာပါ။
ဘလော့ခ်ဂါ ဒီမိုဝေယံ၊ ဘလော့ခ်ဂါ အလင်းဆက်၊ ဘလော့ခ်ဂါ ခမိခဆဲ (၁၉.ဇွန်လ.၂၀၁၀)
No comments:
Post a Comment