Saturday, July 31, 2010

ကျောင်းသားခေါင်းဆောင် ကိုမင်းကိုနိုင်ရဲ့ ကဗျာလေးတပုဒ်



`သစ္စာ´

အမျိုးသားရေးအတွက်

အသက်ပေးသွားသော

ရဲဘော်များအား

တိုင်တည်သစ္စာပြုပါ၏။

မပြီးပြတ်သေး တော်လှန်ရေးတွင်

ကျွန်ုပ်၏သွေးမနီသေးလျှင်

အသင်တို့သွေး ပတ်ဖျန်းပေး၍

ရဲဆေးတင်ပေးကြပါလေ။

မပြီးပြတ်သေး တော်လှန်ရေးတွင်

ကျွန်ုပ်ဝိဥာဉ် ကြောက်စိတ်ဝင်၍

မချင့်မရဲ သတ္တိနည်းလျှင်

သင်တို့ဝိဥာဉ် ပူးကပ်ဝင်၍

ကျွန်ုပ်အားထိန်းချုပ်သွားပါလေ။

မပြီးပြတ်သေးတော်လှန်ရေးတွင်

ကျွန်ုပ်သည်ကား

အမျိုးဂုဏ်မောက် သစ္စာဖောက်ဟု

မထောက်မညှာ ပြုမိပါလျှင်

အသင်တို့၏ မညွတ်ပြောင်းသော

ခွပ်ဒေါင်းလက်ဖြင့်

ဝိုင်းညှပ်အပြစ်ပေးကြပါလေ။

မပြီးပြတ်သေး တော်လှန်ရေးအတွက်

ကျွန်ုပ်အသက် လမ်းတ၀က်မှ

ပေးဆက်ရလည်း

လူ့ဘုံလမ်းခွဲ ၀မ်းမနည်းဘဲ

တာဝန်တရပ်ကျေပြွန်မှန်၍

ထပ်ဆင့်ပျော်ဝင် ကျွန်ုပ်ဝိဥာဉ်သည်

ဒေါင်းအလံကိုဆွဲ လေတွင်ဝဲ၍

သင်တို့ရှိရာ ကျွန်ုပ်လာမည်

ရင်ဖွင့်ကြိုကြပါလေ။



သူငယ်ချင်း

သွားနှင့် သူငယ်ချင်း

ကြယ်အစင်းစင်း ကြွေတဲ့ ဟောဒီကမ္ဘာမြေရဲ့

အနာတရတွေကို စွမ်းသမျှ ကုစားဖို့ ငါတို့ နေရစ်ခဲ့ဦးမယ်။

သွားနှင့် သူငယ်ချင်း

နေအစင်းစင်းပူတဲ့ ကမ္ဘာမြေရဲ့ ဒဏ်ရာတွေကို

လက်ဖဝါးတွေနဲ့ ကာကွယ်ဖို့ ငါတို့ နေရစ်ခဲ့ဦးမယ်။

(၂၀ဝ၇ ဩဂုတ်လ ၇ ရက်နေ့က တာရာမင်းဝေရဲ့ ဈာပနမှာ ၈၈ မျိုးဆက်ကျောင်းသားများ ကိုယ်စား မင်းကိုနိုင် ရေးဖွဲ့ ရွတ်ဆိုတဲ့ကဗျာ)



အကိုတို့၊ အမတို့ နဲ့ ဒီမိုကရေစီ သူရဲကောင်းအပေါင်းတို့ရဲ့ ခံယူချက်နဲ့ ပေးဆပ်မှု ကိုတွေးတိုင်း၊ ရေးတိုင်း ကြည်ညိုလေးစား မိတယ်ဗျာ....


ဘလော့ဂါ အလင်းဆက်

၃၀.ဇူလိုင်လ.၂၀၁၀

No comments:

Post a Comment